Archive for the ‘Mayaa bazaar’ Category

ಪೂಜಾ ಗಾಂಧೀ ಗಲ್ಲಾ ಪೆಟ್ಟಿಗೆ

pooja11

Photo : Bangalore Mirror

ಅಭಿನಯ್ ಥಿಯೇಟರ್ ನಲ್ಲಿ ‘ಅನು’ ಸಿನೆಮಾ ನೋಡಲು ಹೋದವರಿಗೆ ಅಚ್ಚರಿ ಕಾದಿತ್ತು. ಏನ್ ಗೊತ್ತಾ…? ‘ಅನು’ ಹೀರೋಯಿನ್ ಪೂಜಾ ಗಾಂಧಿಯೇ ಗಲ್ಲಾ ಪೆಟ್ಟಿಗೆಯಲ್ಲಿ ಕುಳಿತಿದ್ದರು. ಟಿಕೆಟ್..ಟಿಕೆಟ್ ಅಂತ ಕೇಳೋದು ಟಿಕೆಟ್ ಹರಿಯೋದು. ಅಭಿಮಾನಿಗಳಂತೂ ಸೂಪರ್ ಸುಸ್ತು.

Advertisements

ಸಿನೆಮಟೋಗ್ರಾಫ್-ವಿಟಾಸ್ಕೋಪ್

-ಪರಮೇಶ್ವರ ಗುರುಸ್ವಾಮಿ

ಲ್ಯೂಮಿಯೇರ್‍ ಸಹೋದರರ ’ಸಿನೆಮಟೋಗ್ರಾಫ್’ನ ಜೊತೆಗೇ ಎಡಿಸನ್ ಕಂಪನಿ ಏಕ ವ್ಯಕ್ತಿ ವೀಕ್ಷಣೆಯ ’ಕೈನೆಟೋಸ್ಕೋಪ’ನ್ನು ಬಿಟ್ಟುಕೊಟ್ಟು ಸಮೂಹ ಪ್ರದರ್ಶನಕ್ಕೆ ’ವಿಟಾಸ್ಕೋಪ್’ ಅನ್ನು ಬಳಸಲಾರಂಭಿಸುತ್ತದೆ. ಎರಡೂ ಕಂಪನಿಗಳು ಮೂಲಭೂತವಾಗಿ ಉದ್ಯಮಗಳು. ಇಬ್ಬರ ಕೈಗೂ ಜನರನ್ನು ಸಮ್ಮೋಹನಗೊಳಿಸಿ ಹಣ ಮಾಡುವ ಚಿತ್ರ ತಯಾರಿಕೆ ಮತ್ತು ಪ್ರದರ್ಶನದ ಸಲಕರಣೆಗಳು  ದಕ್ಕಿದ್ದುವು.  ಎರಡೂ ಕಂನಿಗಳು ಪೈಪೋಟಿಯ ಮೇಲೆ ಜನರ ಮೇಲೆ  ಪುಂಖಾನುಪುಂಖವಾಗಿ ಚಿತ್ರಗಳನ್ನು  ಹೇರತೊಡಗಿದರು.ಪ್ರಾರಂಭದ ಚಿತ್ರಗಳು ೧೫ರಿಂದ  ೯೦ ಸೆಕೆಂಡುಗಳಷ್ಟು ಮಾತ್ರ  ಇರುತ್ತಿದ್ದುವು. ಜನರಿಗೆ ತೆರೆಯ ಮೇಲೆ  ಮೂಡುವ  ಚಲನೆಯನ್ನು ವೀಕ್ಷಿಸುವುದೇ ಒಂದು ಹೊಸ, ವಿಶಿಷ್ಟ  ಅನುಭವವಾಗಿತ್ತು. ದಿನನಿತ್ಯದ ಚಲನೆಯ ಯಾವುದೇ ಪ್ರಸಂಗಗಳನ್ನು ಚಿತ್ರೀಕರಿಸುವುದು, ಪ್ರದರ್ಶನಕ್ಕೆ ಬಿಡುವುದು. ಅದೇ ಅಂದಿಗೆ ಅದ್ಭುತ. ಇಲ್ಲೊಂದು ಕುತೂಹಲಕರ ವಿಷಯ. ಜೀವ ವಿಕಾಸದ ಹಾದಿಯಲ್ಲಿ ಜಲಚರಗಳಿಂದ ಮಾನವರವರೆಗೆ ವಿವಿಧ ಹಂತಗಳಿವೆಯಂತೆ. ಅವು ನಮ್ಮ ದಶಾವತಾರದ ಕಲ್ಪನೆಯಲ್ಲಿವೆ ಎಂದೂ ಹೇಳುತ್ತಾರೆ. ನೀರಿನ ಮೀನು, ಆಮೆ, ಭೂಮಿಯ ಮೇಲಿನ ಹಂದಿ, ಅರೆ ಮನುಷ್ಯ ಮತ್ತು ಅರೆ ಪ್ರಾಣಿ ನರಸಿಂಹ, ಕುಳ್ಳ ವಾಮನ, ಪರಶುರಾಮ,  ಪುರುಷೋತ್ತಮ ರಾಮ ಮತ್ತು ಮಹಾನ್ ಜ್ಞಾನಿ ಮತ್ತು ಪ್ರಾಕ್ಟಿಕಲ್ ಮ್ಯಾನ್ ಕೃಷ್ಣ. ಇವೆಲ್ಲ ಮಾನವಜೀವಿಯ ಬೌತಿಕ ಮತ್ತು ಬೌದ್ಧಿಕ ವಿಕಾಸದ ಹಂತಗಳನ್ನು ಸಂಕೇತಿಸುತ್ತವಂತೆ. ಒಂದು ಮಗು ಹುಟ್ಟಿದಾರಭ್ಯ ಈ ಹಂತಗಳನ್ನು ದಾಟಿಯೇ ವ್ಯಕ್ತಿಯಾಗಿ ರೂಪುಗೊಳ್ಳುತ್ತದಂತೆ. ಹಾಗೆಯೇ ಈಗಲೂ ಯಾರಾದರು ಹೊಸದೊಂದು ವಿಡಿಯೋ ಕ್ಯಾಮೆರ ಕೊಂಡುಕೊಂಡು ಹೊಸದಾಗಿ ಪ್ರಾರಂಭಿಸಿದರೆ ಚಲನಚಿತ್ರ ಮಾಧ್ಯಮ ಬೆಳೆದು ಬಂದ ಹಂತಗಳನ್ನೇ ತಮ್ಮ ಚಿತ್ರೀಕರಣದಿಂದ ಹಿಡಿದು ಸಂಕಲನ ಮುಂತಾದ ಹಂತಗಳನ್ನು ಭೇಟಿ ಮಾಡುತ್ತಾರೆ.

ಸರಿ. ಪ್ರಾರಂಭದ ಲ್ಯೂಮಿಯೇರ್‍ ಚಿತ್ರಗಳು ದೃಶ್ಯಾತ್ಮಕ ವಾಸ್ತವಗಳಾಗಿದ್ದುವು. ವಿವಿಧ ರೀತಿಯ ನೋಟಗಳನ್ನು ದಾಖಲಿಸುತ್ತಿದ್ದುವು. ಸಾಮನ್ಯ ನೋಟ, ಹಾಸ್ಯ ನೋಟ, ಸೇನಾ ನೋಟ. ಹೀಗೆ. ಅವರ ಚಿತ್ರಗಳಲ್ಲಿ ಬಹಳ ಪ್ರಸಿದ್ಧವಾಗಿದ್ದುದು ತೋಟವೊಂದರಲ್ಲಿ ನಡೆಯುವ ಹಾಸ್ಯ ನೋಟ. ಈ ಹೊರಾಂಗಣ ಚಿತ್ರದಲ್ಲಿ ಹುಲ್ಲಿಗೆ ಪೈಪಿನಿಂದ ಮಾಲಿ ನೀರುಣಿಸತ್ತಿರುತ್ತಾನೆ. ಒಬ್ಬ ಕಿಡಿಗೇಡಿ ಬಾಲಕ ಆ ಪೈಪಿನ ಮೇಲೆ ಮಾಲಿಗೆ ಕಾಣಿಸಿಕೊಳ್ಳದಂತೆ ಕಾಲಿಟ್ಟು ಒತ್ತುತ್ತಾನೆ. ಪೈಪಿನಲ್ಲಿ ನೀರು ನಿಂತದ್ದನ್ನು ಗಮನಿಸಲು ಮಾಲಿ ಅದರ ತುದಿಯನ್ನು ಪರೀಕ್ಷಿಸಲು ಮುಖದ ಬಳಿ ತರುತ್ತಾನೆ. ಆಗ ಆ ಹುಡುಗ ತ್ನನ ಕಾಲನ್ನು ಪೈಪಿನ ಮೇಲಿಂದ ಎತ್ತಿಬಿಡುತ್ತಾನೆ. ಮಾಲಿಯ ಮುಖಕ್ಕೆ ಪೈಪು ನೀರನ್ನು ಉಗಿಯುತ್ತದೆ. ಹುಡುಗ ನಗುತ್ತಾನೆ. ಚಲನಚಿತ್ರ ಮಾಧ್ಯಮದ ಆ ಶೈಶವ ಹಂತದಲ್ಲಿ ಹೊಸ ಆಟಿಕೆಯಂತಿದ್ದ ಕ್ಯಾಮೆರ, ನಾಟಕವನ್ನು ನೋಡುತ್ತಿರುವ ಪ್ರೇಕ್ಷಕನ ಸ್ಥಾನದಲ್ಲಿತ್ತು ಅಷ್ಟೆ. ಪಾತ್ರಗಳು ಎಡದಿಂದ ಬಲಕ್ಕೆ ಬಲದಿಂದ ಎಡಕ್ಕೆ ಓಡಾಡುತ್ತಿದ್ದುವು. ಚಿತ್ರ ಮಾಧ್ಯಮದ ಕಲೆಯಿನ್ನೂ ರೂಪುಗೊಳ್ಳಬೇಕಿತ್ತು. ಜನ ಮಾತ್ರ ಈ ಹೊಸ ಮಾಧ್ಯಮದ ಸಮ್ಮೋಹಕ್ಕೆ ಒಳಗಾಗಿದ್ದರು.

ಸಿನೆಮಾ ಹುಟ್ಟಿಕೊಂಡ ವರ್ಷದಲ್ಲಿ ಮತ್ತು ಮರು ವರ್ಷದಲ್ಲೇ ಎಡಿಸನ್ ಕಂಪನಿ ಎರಡು ವಿವಾದಗಳನ್ನು ತನ್ನ ಚಿತ್ರಗಳ ಮೂಲಕ ಹುಟ್ಟು ಹಾಕಿತು. ೧೮೯೫ರಲ್ಲಿ ಅದು ತಯಾರಿಸಿದ ’ದ ಎಕ್ಸಿಕ್ಯೂಷನ್ ಆಫ್ ಮೇರಿ, ಕ್ವೀನ್ ಆಫ್ ಸ್ಕಾಟ್, ಎಂಬ ಚಿತ್ರದ್ಲಲಿ ಬರುವ ಮೇರಿಯ ತಲೆ ಕಡಿಯುವ ದೃಶ್ಯ ಬಹಳ ಜನರನ್ನು ಕಂಗೆಡಿಸಿತ್ತು. ನಮ್ಮಿಂದ ಕೇವಲ ಒಂದು ಕಾಸು ಕೀಳುವುದ್ಕಕಾಗಿ ಅವರು ಹೆಂಗಸೊಬ್ಬಳ ಕೊಲೆಯನ್ನೇ ಮಾಡಿ ಚಿತ್ರೀಕರಿಸಿದ್ದಾರೆ ಎಂದು ನಂಬಿದ್ದರು. ಎರಡನೆಯದು ೧೮೯೬ರಲ್ಲಿ ಅದು ತಯಾರಿಸಿದ ’ಜಾನ್ ರೈಸ್-ಮೇರಿ ಇರ್‍ವಿನ್ ಚುಂಬನ’. ಆ ಚುಂಬನದ ದೃಶ್ಯವನ್ನು ತೆರೆಯ ಮೇಲೆ ನೋಡಿ ಮಾರಲಿಸ್ಟ್ಗಳು ಕುಂಡೆ ಸುಟ್ಟವರಂತೆ ಹಾಹಾಕಾರವನ್ನೇ ಎಬ್ಬಿಸಿದ್ದರು. ತೆರೆಯ ಮೇಲೆ ಬೃಹದಾಕಾರದ ಬಾಯಿ ತುಟಿಗಳು ನಡೆಸುವ ಚುಂಬನ ಕ್ರಿಯೆ ಕುರಿತ ನೈತಿಕ ಪ್ರಶ್ನೆ ಸ್ಥಳೀಯ ಪತ್ರಿಕೆಗಳ ವಾಚಕರ ವಾಣಿ ಮತ್ತು ಪೆಟಿಷನ್ ಗಳಾಗಿ ಸ್ಥಳೀಯ ರಾಜಕಾರಣಿಗಳ ಕಛೇರಿಗಳ ತುಂಬಾ ತುಂಬಿ ಹೋಗಿತ್ತು.

ಹೀಗೆ ವಾಸ್ತವತೆಯಲ್ಲಿ ಲ್ಯೂಮಿಯೇರ್‍ ಮತ್ತು ನಾಟಕೀಯತೆಯಲ್ಲಿ ಎಡಿಸನ್ ಕಂಪನಿಗಳು ತಜ್ಞತೆಯನ್ನು ಪ್ರದರ್ಶಿಸಿದರೂ ಕ್ರಮೇಣ ಇವರನ್ನು ಅವರು ಅವರನ್ನು ಇವರು ಅನುಕರಿಸುವುದು ಶುರುವಾಗಿ  ಒಬ್ಬರ ಹೂರಣವನ್ನು ಮತ್ತೊಬ್ಬರು ಕದಿಯ ತೊಡಗಿದರು. ಜನರಿಗೆ ಹಳಸಲು ಎನಿಸ ತೊಡಗಿತ್ತು. ಹುಟ್ಟಿದ ಮೂರೇ ವರ್ಷಗಳಲ್ಲಿ ಜಗತ್ತಿನ ಮೂರನೇ ಲಾಭದಾಯಕ ಉದ್ದಿಮೆ ಎನಿಸಿದ್ದ ಸಿನೆಮಾ ಮಾಧ್ಯಮ ಸೊರಗ ತೊಡಗಿತ್ತು. ಪರಸ್ಪರ ಸ್ಪರ್ಧೆ ಮತ್ತು ಚೌ‍ರ್ಯಗಳ ಜೊತೆಗೆ ಈ ಎರಡು ಕಂಪನಿಗಳು ಅಮೆರಿಕಾ, ಇಂಗ್ಲಂಡ್ ಮತ್ತು ಫ್ರಾನ್ಸ್ ಗಳಲ್ಲಿ ಹೊಸದಾಗಿ ಹುಟ್ಟಿಕೊಂಡ ಸ್ಪರ್ಧಿಗಳನ್ನು ಅವರು ಮಾಡುತ್ತಿದ್ದ ತಮ್ಮ ಕೃತಿಗಳ ಚೌರ್ಯವನ್ನೂ ಎದುರಿಸ ಬೇಕಾಗಿ ಬಂತು. ಮುಂದಿನ ಚಲನ ಚಿತ್ರ ಇತಿಹಾಸದ ಹತ್ತು ವರ್ಷಗಳು ಚಲನಚಿತ್ರ ರಂಗದ ಕಾನೂನು ರಹಿತ ವಾಣಿಜ್ಯ ಚಟುವಟಿಗಳು ಮತ್ತು ಕಲಾತ್ಮಕತೆಯ ಅನ್ವೇಷಣೆಯಾಗಿದೆ.

 

ಗ್ರಾಂಡ್ ಕೆಫೆಯ ನೆಲಕೋಣೆಯಲ್ಲಿ..

ಮಾಯಾ ಬಜಾರ್

-ಪರಮೇಶ್ವರ ಗುರುಸ್ವಾಮಿ 

 

ಲ್ಯೂಮಿಯೇರ್‍ ಸಹೋದರರು ಮಾರ್ಚ್ ೨೨, ೧೮೯೫ರಂದು ತಮ್ಮ ಸಿನೆಮಾಟೊಗ್ರಾಫ್ ಎಂಬ ಕ್ಯಾಮೆರಾದಲ್ಲಿ ಚಿತ್ರೀಕರಿಸಿದ್ದ  ದೃಶ್ಯವನ್ನು ಆಹಾನ್ವಿತ ಪ್ರೇಕ್ಷಕರಿಗೆ ಪ್ರದರ್ಶಿಸಿದ್ದರು. ಅದು, ಲ್ಯೂಮಿಯೇರ್‍ ಕಾರ್ಖಾನೆಯಿಂದ ಕೆಲಸ ಮುಗಿಸಿ ಹೊರಬರುತ್ತಿರುವ ಕಾರ್ಮಿಕರನ್ನು ಚಿತ್ರೀಕರಿಸಿದ ದೃಶ್ಯವಾಗಿತ್ತು. ಪುನಃ ಅದೇ ವರ್ಷ ಜೂನ್ ೧೦ರಂದು ೮ ಚಿತ್ರ ತುಣುಕುಗಳನ್ನು ಪ್ರದರ್ಶಿಸಿದ್ದರು. ಅದೇ ವರ್ಷ ಡಿಸೆಂಬರ್‍ ೨೮ರಂದು ಸಾರ್ವಜನಿಕರಿಗೆ ಪ್ರವೇಶ ದರ ವಿಧಿಸಿ ಪ್ಯಾರಿಸ್ಸಿನ ಗ್ರಾಂಡ್ ಕೆಫೆಯ ನೆಲಕೋಣೆಯಲ್ಲಿ ಕೆಲವು ಚಿತ್ರಗಳನ್ನು ಪ್ರದರ್ಶಿಸಿದರು. ಈ ದಿನಾಂಕವನ್ನೆ ಸಿನೆಮಾ ಹುಟ್ಟಿದ ದಿನವೆಂದು ಸಾಮಾನ್ಯವಾಗಿ ಎಲ್ಲರೂ ಪರಿಗಣಿಸುತ್ತಾರೆ. ತಾಂತ್ರಿಕವಾಗಿ ಮಾರ್ಚ್ ೨೨ರಂದು ನಡೆದ ಪ್ರದರ್ಶನವೇ ಮೊದಲನೆಯದಾದರೂ ಅಂದಿನ ಮತ್ತು ಜೂನ್ ೧೦ರಂದಿನ  ಪ್ರದರ್ಶನಗಳು ಖಾಸಗಿಯಾಗಿದ್ದು ಡಿಸೆಂಬರ್‍ ೨೮ರ ಪ್ರದರ್ಶನ ಸಾರ್ವಜನಿಕ ಮತ್ತು ಪ್ರವೇಶ ದರ ವಿಧಿಸಿದ್ದರಿಂದಾಗಿ ಇಂಡಸ್ಟ್ರಿಯ ಜನರಿಗೆ  ಮುಖ್ಯವಾದ ದಿನ.

ಆವತ್ತಿನ ಪ್ರೇಕ್ಷಕರಿಗೆ ತೆರೆಯ ಮೇಲೆ ಚಲನವಲನಗಳಿಂದ ಕೂಡಿದ ಪ್ರತಿಬಿಂಬಗಳನ್ನು ನೋಡುತ್ತಿರುವುದು ಹೊಸ ಅನುಭವ. ತೆರೆಯ ಮೇಲೆ ರೈಲೊಂದು ನಿಲ್ದಾಣಕ್ಕೆ ಆಗಮಿಸುತ್ತಿರುವ ದೃಶ್ಯವನ್ನು ನೋಡುತ್ತಿದ್ದವರು ರೈಲು ತಮ್ಮ ಮೇಲೇ ನುಗ್ಗಿಬಿಡುತ್ತಿದೆ ಎಂಬ ಗಾಬರಿಯಿಂದ ಅರಚುತ್ತ ಚೆಲ್ಲಾಪಿಲ್ಲಿಯಾಗಿದ್ದರಂತೆ.

ಎಡಿಸನ್ನನ ಚಿತ್ರವೊಂದು ಸಮುದ್ರದ ಅಲೆಗಳನ್ನು ಸೆರೆ ಹಿಡಿದಿತ್ತು.  ಆ ದೃಶ್ಯವನ್ನು ವೀಕ್ಷಿಸುತ್ತಿದ್ದ ಮುಂದಿನ ಸಾಲಿನ ಪ್ರೇಕ್ಷಕರು ತಮ್ಮ ಮೇಲೆ ತುಂತರು ಹನಿಯುತ್ತದೆ ಎಂದು ಛತ್ರಿಯನ್ನು ಅಡ್ಡ ಹಿಡಿದಿದ್ದರಂತೆ.  ಹಾಗೆ ನೋಡಿದರೆ ಮೊದಲು ಚಲನಚಿತ್ರಗಳನ್ನು ಜನರಿಗೆ ತೋರಿಸಿದವನು ಥಾಮಸ್ ಆಲ್ವ ಎಡಿಸನ್. ಗೊತ್ತಲ್ಲ. ಶಾಲೆಯಲ್ಲಿ ಡಲ್ ವಿದ್ಯಾರ್ಥಿ ಎನಿಸಿಕೊಂಡಿದ್ದವನು ಮುಂದೆ ಪ್ರಖ್ಯಾತ ಸಂಶೋಧಕನಾದವನು. ಆಧುನಿಕ ಜೀವನದಲ್ಲಿ ಅನಿವಾರ್ಯವೆನಿಸಿದ ೧೫೦ಕ್ಕೂ ಹೆಚ್ಚು ವಸ್ತುಗಳನ್ನು ಕೊಟ್ಟವನು. ಕರೆಂಟ್ ದೀಪ ಅವುಗಳಲ್ಲಿ ಒಂದು. 

೧೮೯೧ರಲ್ಲಿಯೇ “ಫ್ರೆಡ್ ಆಟ್ ನ ಸೀನು” ಎಂಬ ತುಣುಕನ್ನು ಎಡಿಸನ್ ಕಂಪನಿ ಚಿತ್ರೀಕರಿಸಿತ್ತು. ಎಡಿಸನ್ನನ ಕಂಪನಿಯಲ್ಲಿ ಚಲನಚಿತ್ರ ವಿಭಾಗದ ಉಸ್ತುವಾರಿ ಹೊತ್ತಿದ್ದವನು ವಿಲಿಯಮ್ ಕೆನಡಿ ಡಿಕ್ಸನ್. ಇವನು ಸಿನೆಮಾದ ಮೊದಲ ಥಿಯರೆಟೀಷಿಯನ್ ಸಹ. ಇವನ ಮಾತನ್ನು ಕೇಳಿದ್ದರೆ ಎಡಿಸನ್ನನೇ ಸಿನೆಮಾದ ಜನಕನಾಗುತ್ತಿದ್ದ. ಸಿನೆಮಾದಲ್ಲಿ ಅಂತಾ ದುಡ್ಡು ಇಲ್ಲ ಎಂದು ಭಾವಿಸಿದ ಎಡಿಸನ್ ಡಿಕ್ಸನ್ನನ ಪ್ರಯೋಗಗಳನ್ನು ಮುಂದುವರೆಸುವುದಿಲ್ಲ. ಎಡಿಸನ್ ಕಂಪನಿಯ ಚಿತ್ರೀಕರಣ ಕ್ಯಾಮೆರಾದ ಹೆಸರು ’ಕೈನೆಟೋಗ್ರಾಫ್’ ಮತ್ತು ಪ್ರದರ್ಶಕದ ಹೆಸರ ’ಕೈನೆಟೋಸ್ಕೋಪ್’. ಗುಣಮಟ್ಟದಲ್ಲಿ ಚೆನ್ನಾಗಿದ್ದುವು. ಇನ್ನೊಂದು ವಿಷಯ. ಕ್ಯಾಮೆರಾದಲ್ಲಾಗಲಿ ಪ್ರೊಜೆಕ್ಟರ್‍ ನಲ್ಲಾಗಲಿ ಫಿಲ್ಮ್ ಪಟ್ಟಿಯು ಸೆಕೆಂಡಿಗೆ ಇಂತಿಷ್ಟು ಫ್ರೇಮ್ ಗಳ ವೇಗದಲ್ಲಿ ಚಲಿಸಬೇಕಲ್ಲ. ಅದಕ್ಕಾಗಿ ಪಟ್ಟಿಯ ಎರಡೂ ಬದಿಯಲ್ಲಿ ಫ್ರೇಮಿಗೆ ನಾಲ್ಕರಂತೆ ರಂಧ್ರಗಳನ್ನು ಮಾಡಿದವನು ಎಡಿಸನ್. ಇಂದಿಗೂ ಅದೇ ಪ್ರಮಾಣ.

ಆದರೆ ಕೈನೆಟೋಗ್ರಾಫ್ ಬಳಸಿ ಚಿತ್ರೀಕರಿಸುವುದೇ ಒಂದು ಹರ ಸಾಹಸ. ಏಕೆಂದರೆ ಅದು ಭಾರೀ ಗಾತ್ರದಾಗಿದ್ದು ಹಳಿಗಳ ಮೇಲಿಟ್ಟು ಹೆಚ್ಚು ಕಡಿಮೆ ಸ್ಥಾವರ ಅನ್ನುವಷ್ಟರ ಮಟ್ಟಿಗೆ ನಿರ್ಬಂಧಿತ ಚಲನೆಯನ್ನು ಹೊಂದಿತ್ತು. ಚಿತ್ರೀಕರಣಕ್ಕಾಗಿ ’ಬ್ಲಾಕ್ ಮಾರಿಯಾ’ ಎಂಬ ತಡಿಕೆಯಂಥ ಸ್ಟುಡಿಯೋವನ್ನು ನಿರ್ಮಿಸಲಾಗಿತ್ತು. ಅದರ ನೆತ್ತಿಯಲ್ಲಿ ಬೆಳಕಿಗಾಗಿ ದೊಡ್ಡ ಕಿಂಡಿಯನ್ನಿಡಲಾಗಿತ್ತು. ಆಕಾಶದಲ್ಲಿ ಸೂರ್ಯ ಚಲಿಸಿದತೆ ಬ್ಲಾಕ್ ಮಾರಿಯಾದೊಳಗಿನ ಬೆಳಕಿನ ಕಿರಣಗಳೂ ಚಲಿಸುತ್ತಿದ್ದುವು. ಅದನ್ನನುಸರಿಸಿ ಕಲಾವಿದರ ನಟನಾ ಪ್ರದೇಶ ಸಹ ಬದಲಾತ್ತಿತ್ತು. ಬೆಳಿಗ್ಗೆ ಈ ತುದಿಯಲ್ಲಿದ್ದರೆ ಸಂಜೆಯ ಹೊತ್ತಿಗೆ ಆ ತುದಿ. ಇದನ್ನೆಲ್ಲ ಅನುಸರಿಸಿಕೊಂಡು ದೈತ್ಯ ಕೈನೆಟೋಗ್ರಾಫ್    ಹಳಿಯ ಮೇಲೆ ಸೂಕ್ತ ಸ್ಥಳದಲ್ಲಿ ನಿಂತು ಚಿತ್ರೀಕರಿಸುತ್ತಿತ್ತು. ಇನ್ನು ಕೈನೆಟೋಸ್ಕೋಪ್. ಇದಂತೂ ಸ್ಥಾವರವೇ. ಅದರ ಇಣಕು ಕಿಂಡಿಯಲ್ಲಿ ಕಣ್ಣನ್ನಿಟ್ಟು ಒಂದು ನಿಕ್ಕಲ್ ಕಾಸನ್ನು ಹಾಕಿದರೆ ಕೆಲವು ಸೆಕೆಂಡುಗಳ ಚಲನಚಿತ್ರ ವೀಕ್ಷಣೆ.  ಬಾಂಬೆ ದೇಖೋ, ಡೆಲ್ಲಿ ದೇಖೋ ಇತ್ತಲ್ಲ ಹಾಗೆ.

ಎಡಿಸನ್ನ ಕಂಪನಿಯಲ್ಲಿ ಫ್ರೆಡ್ ಆಟ್ ಎಂಬ ಒಬ್ಬ ಕಾರ್ಮಿಕನಿದ್ದ. ಅವನು ಹಾಸ್ಯಸ್ಪದ ಹಾವಭವಗಳನ್ನು ಪ್ರದರ್ಶಿಸುತ್ತಿದ್ದ. ಸರಿ. ಡಿಕ್ಸನ್ ಅವನು ಹಾಸ್ಯ ಭಂಗಿಯಲ್ಲಿ ಸೀನುವುದನ್ನು ಕ್ಲೋಸ್ ಅಪ್ ನಲ್ಲಿ ಚಿತ್ರೀಕರಿಸಿದ, ಇದು ದಾಖಲಾಗಿರುವ ಮೊದಲ ಚಲನಚಿತ್ರ.

ಸಿನೆಮಾ ಮಾಧ್ಯಮವು ಟಿಂಕರ್‍ ಮತ್ತು ತಿಂಕರ್‍ ಗಳು ನಮಗೆ ಕೊಟ್ಟ ಕೊಡುಗೆ. ಭಾರಿ ಜುಗ್ಗನಾಗಿದ್ದ ಎಡಿಸನ್ ಗೆ  ಚಲನಚಿತ್ರವು ಒಂದು ಹಣ ಮಾಡುವ  ಚಟುವಟಿಕೆಯಾಗಿ ಬೆಳೆಯುವ ಬಗ್ಗೆ ನಂಬಿಕೆಯಿಲ್ಲದ್ದರಿಂದ ಯೂರೋಪಿನಲ್ಲಿ ತನ್ನ ಸಲಕರಣೆಗಳನ್ನು ಪೇಟೆಂಟ್ ಮಾಡಿಸಿರಲಿಲ್ಲ. ಫ್ರಾನ್ಸಿನ ಲ್ಯೂಮಿಯೇರ್‍ ಸಹೋದರರು ೧೮೯೪ರಲ್ಲಿ ಎಡಿಸನ್ನನ ಸಲಕರಣೆಗಳನ್ನು ತೆಗೆದುಕೊಂಡು ಅದನ್ನು ಬಿಚ್ಚಿ, ಜೋಡಿಸಿ ಪ್ರಯೋಗಗಳನ್ನು ಮಾಡಿ ತಮ್ಮದೇ ಆದ ಸಿನೆಮಾಟೋಗ್ರಾಫ್ ಯಂತ್ರವನ್ನು ಅಭಿವೃದ್ಧಿ ಪಡಿಸಿದರು. ಇವರ ಆವಿಷ್ಕಾರ ಜಗತ್ತಿನ ಮನರಂಜನೆ ಮತ್ತು ಉದ್ಯಮಲೋಕಗಳಲ್ಲಿ ಕ್ರಾಂತಿಯ ಬಿರುಗಾಳಿಯನ್ನೇ ಎಬ್ಬಿಸಿತು.

 

ಮುಖ್ಯವಾಗಿ, ಇವರ ಸಿನೆಮಾಟೋಗ್ರಾಫ್ ಪುಟ್ಟದಾಗಿತ್ತು ಮತ್ತು ಜಂಗಮವಾಗಿತ್ತು. ಎಲ್ಲಿಗೆ ಬೇಕೆಂದರೆ ಅಲ್ಲಿಗೆ ಕೊಂಡೊಯ್ದು  ಚಿತ್ರೀಕರಣ ಮಾಡಬಹುದಾಗಿತ್ತು. ಬಹಳ ಸರಳವಾದ ಉಪಕರಣವಾಗಿತ್ತು. ಚಿತ್ರೀಕರಿಸಲು ವಿದ್ಯತ್ತಿನ ಅಗತ್ಯವಿಲ್ಲದೆ ಕೈಯಲ್ಲೇ ಕ್ರಾಂಕ್ ಮಾಡಬಹುದಿತ್ತು. ಅಲ್ಲದೇ ಅದೇ ಉಪಕರಣದ ಮೂಲಕ ತರೆಯ ಮೇಲೆ ವಿಕ್ಷಕ ಸಮೂಹಕ್ಕೆ ಪ್ರದರ್ಶನ ಮಾಡಬಹುದಿತ್ತು. ಈಗ ಬಳಕೆಯಲ್ಲಿರುವ ಅತ್ಯಾಧುನಿಕ ಚಲನಚಿತ್ರ ಕ್ಯಾಮೆರಾಗಳ ಆದಿ ಕ್ಯಾಮೆರಾ ಮತ್ತು ಪ್ರೊಜೆಕ್ಟರ್‍ ಗಳ ಆದಿ ಪ್ರೊಜೆಕ್ಟರ್‍ ಈ ಸಿನೆಮಾಟೋಗ್ರಾಫ್. ಆದ್ದರಿಂದಲೇ ಲ್ಯೂಮಿಯೇರ್‍ ಸಹೋದರರನ್ನು ಚಲನಚಿತ್ರ ಮಾಧ್ಯಮದ ಜನಕರೆಂದು ಗುರುತಿಸುವುದು.